د.محمد اقبال النعيمي يكتب : بعض المعلومات عن دمشق و سكانها ما بعد التحرير :

١.الناس فرحانة و الجدران زعلانة
٢.الكل حيقلك بعد التحرير الوضع أحسن لكن خايفين ( من شو ما بتعرف )
٣.الكل حيقلك انه نحن كنا مجبورين نسكت او نطبل للنظام لان عنا اولاد و عيلة و بدنا نعيش و كأن بقية المحافظات اللي ثارت مو هيك
٤.و هذا مهم جدااااا .. اذا بدك تفرق بين اللي كان ساكت فعلا و قلبه مع الثورة و بين اللي كان مع النظام و يطبله و يهتفله و ربما يشبح له .. فقط اسأله شو رأيك ب بشار ..

إن اجابك .. خائن جبان هرب و تركنا .. فهذا من النوع الثاني الذي كان يحبه و يهتف له .. و مشكلته مع بشار فقط انه هرب و تركهم
اما ان اجابك .. هو قاتل مجرم سفاح طاغية فهذا من النوع الاول

٥.و ايضا هناك طريقة ثانية .. لكنها اقل دقة .. و هو اللي بيقلك ازمة بدل كلمة ثورة .. لان الاكثرية هنا يقولوها و مو متعودين يقولوا ثورة و ثوار و مجاهدين فضلا انهم اول مرة بشوفوهم
٦.لماذا كل هذا في دمشق تحديدا و لماذا الشغل و الجهد فيها اكثر

لان المدن التي دخلها الثوار سابقا خلال سنين الثورة و تحررت لمدة ما ( مثل حمص و حلب و غيرها ) و استنشقت نَفَس الثورة تختلف تماما عن المدن التي لم تتحرر ابدا من قبل و اول مرة بيشوفونا ك ثوار و مجاهدين ( مثل دمشق و الساحل ) ..

لذلك في دمشق الامر مختلف و الناس مصدومة و مندهشة و متلبكة و مو عارفة شو تسوي .. لما اقلهم انا من ادلب ما بيعرفوا شو يجاوبوا و يتلبكوا .. تحديدا النوع الثاني اللي كان مع النظام
بالمقابل .. النوع الاول بمجرد ما يشوفوا لفاحة علم سوريا على رقبتي ( علم الثورة سابقا ) بيصيروا بيحيونا و بيقولوا اكيد انت من ادلب ( لأنه نحن اهل ادلب طول الوقت رافعين هذا العلم )

٧.الخلاصة و اللي قصدته انه نعمة التحرير لا يضاهيها نعمة .. و نعمة ادلب و قيمتها سيبقى الى ما شاءالله .. و ان دمشق الشغل فيها كثير لان الناس فيها الى الآن مو مستوعبة و مو متعاونة كما يجب لدرجة انه ما بدهم ينظفوا قدام بيوتهم و منتظرين الدولة الجديدة تقوم بذلك لكي يقيموها و يعطوها العلامة التي تستحقها

على كل اجبت و رددت على كل هذه النقاط في مشاركة باحدى القنوات الفضائية سأرسلها لكم باذن الله

كتبه لكم من دمشق ..
د.محمد اقبال النعيمي .. 15/01/2025

نسخ الرابط تم نسخ الرابط