رياضة : ضربة جوية مستحيلة

هو ليه ضرب سد النهضة الإثيوبي بالطيران المصري مستحيل! وإيه علاقة ده  بمنظومة سبايدر الإسرائيلية للدفاع الجوي  !  أكيد السؤال ده لغم  وكمان من المحظورات لكن أنا هجاوبلك عليه الآن وبشكل واضح ومباشر  ! 
لكن قبل الإجابة خلونا نبدأ بالسؤال ده  : ليه إثيوبيا اختارت منظومة  سبايدر الإسرائيلية للدفاع الجوي قصير ومتوسط المدى؟؟
ببساطة عشان قوية جدا في اصطياد المقاتلات الشرسة الجوية وده اللي خلى الهند تعتمدهما  كمنظومة أساسية  للجيش الهندي وقبل الهند استخدمتها دول  تانية  زي  سنغافورة  وجورجيا والبيرو وكلام إن دولة الإمارات اشترت نفس المنظومة الإسرائيلية بمبلغ ضخم جدا !
طب هل منظومة صواريخ  سبايدر الإسرائيلي  والتي تم زرعها بمحيط سد النهضة لتأمينه ممكن توقع طيران مصر لو حصل وبدأ الصدام والقصف المصري للسد ، وده اللي لمح له وزير خارجية مصر بدر عبد العاطي  لما خرج  وصرّح من ساعات إن تجربة مصر المريرة بشأن السد الإثيوبي ولمدة  13 عامًا كانت دون نتيجة في اشارة غير مباشرة من بدر، إن الحل العسكري ممكن يكون اقترب بجد ! 
ونركن تصريح بدر على جانب ونقول لحضرتك  معلومة ع السريع  ، سبايدر هو نظام دفاع جوي إسرائيلي متحرك قصير ومتوسط المدى طورته أنظمة رافائيل الدفاعية المتقدمة بمساعدة من شركة صناعات الفضاء الإسرائيلية.
طب لما نظام ( سبايدر) ده  سبع رجاله في بعض كده.. ومرعب ! ليه ماسدش مع صواريخ  بدائية لجأت لها حماس على مدار15 شهرا ، الفترة اللي امتدت فيها حرب طوفان الاقصى مع جيش الاحتلال   ! 
 وخدوا الصدمة الكبيرة ! 
في المناوشات الباكستانية الهندية الأخيرة التي حدثت في شهر فبراير 2019 حول إقليم جامو وكشمير. استطاعت الطائرات الباكستانية أن تخدع منظومة سبايدر تمامًا ونجحت  12 مقاتلة باكستانية من طراز إف -16 و4 مقاتلات من طراز ميراج أن تنفذ عملية في العمق الهندي دون خسائر،  وفشلت المنظومة الإسرائيلية  تماما في التصدي للمقاتلات والصواريخ والقنابل الباكستانية
معنى ده ايه ؟
معناه إن منظومة  سبايدر الإسرائيلية  وهم كبير و"فنكوش" زي ما بيقولوا  بالمصري.
  طب ليه منظومة سبايدر واخده كل الصيت الضخم  ده  واهتمام اكبر من حجمها ؟
الاجابة ببساطة قٌدرة اسرائيل على الدعاية لمنتجاتها و اسلحتها الجوية!
ونرجع بالذاكرة للخلف  حِسبة 50 سنة ونشوف إيه اللي حصل لخط بارليف اللي وصفته إسرائيل بالأسطورة والخط المانع الذي لا يقهر!!
ايه اللي حصله ؟
الجيش المصري في حرب النصر العظيمة أكتوبر73 أسقطه  بخرطوم ميه .. تخيلوا     ! 
عشان كده لما تلاقي لجان إلكترونية مشبوهة بتشكك في الجيش المصري وقدراته ، ولا تبص لها . متعلقش.. نفض  .. سيب تاريخ الجيش المصري هو اللي يتكلم  .
ومش هنتكلم عن قدرات سلاح الجو المصري اللي امريكا شايفاه كمان من أعظم الاسلحة عالميا.. لكن هنقولك حاجة بسيطة عن أجهزة التشويش المصرية المتطورة  بسلاح الجو المصري وركز معايا !   
الاجهزة دي قادره إنها تعمي رادارات سبايدر عن المقاتلات والصواريخ المهاجمة. كما أنّه باستخدام منظومة «سبيكترا» المتواجدة علي مقاتلات الرافال الشبحية المصرية يمكن رصد أماكن رادارات سبايدر
أيضا وبالكثافة العددية في الطائرات المهاجمة يمكن التغلب على المنظومة الإسرائيلية .. وده كله ولسه متكلمناش عن تدخل المنصات الإلكترونية الجوية التي تمتلكها مصر “ والمعروفة بطائرات الحرب الإلكترونية أو اكس”.. 
  يعني إيه ؟   
يعني منظومة سبايدر الاسرائيلية  مش الحصن المنيع اللي ممكن يحمي سد زي سد النهضة من رافال ومقاتلات مصر الشبحية 
وسيبك من منظومة سبايدر الإسرائيلي الوهم دي .. وخد السؤال ده: فرضا وصلت الطائرات المصرية  إلى سد النهضة إيه اللي ممكن يحصل؟
السؤال للجمهور الكبير الذي يطالب الان بنسف سد النهضة وتأديب إثيوبيا  !  
طب هل مطلوب من الطيران المصري اختراق الأجواء الإثيوبية للتأكيد على إن مصر قادرة على التعامل العسكري فتخاف إثيوبيا وتقوم بتسوية ملف السد وتلم نفسها مع القاهرة
ولاّ مطلوب من مصر إنها تضرب جزء من السد عشان تعطل عمليات التخزين فيه  ..  ولاّ الجمهور الكبير ده حابب إن المقاتلات المصرية تدمره كله على بعضه وتجيب عاليه واطيه  !
تعالى نفكر بالراحة:
لو اخترقت المقاتلات المصرية نطاق الجو الإثيوبي او ضربت جزء من السد فدي  مشكلة  !
 ليه ؟  
عشان إثيوبيا دولة ذات سيادة ومن حقها أن تلجأ لمجلس الأمن وتشتكي مصر وهترجع تاني إثيوبيا تعيد بناء ما تم  ضربه بالسد! 
ولو عايز الطيران المصري يقوم بنسف السد وتدميره بالكامل ، فده برضه صعب جدا عشان ده  اعتداء على سيادة الدولة وبسرعة إثيوبيا هتلجأ لمجلس الأمن واللي خلاها تبني السد مرة هتقوم بنائه مرة تانية لو تم تدميره  وجايز أوي يكون على نفقة مصر بأمر من مجلس الأمن على سبيل التعويض  .   
غير كده في الأصعب واللي يخلي مسألة ضرب سد النهضة صعبة جدا على مصر وكمان مستحيلة! 
إيه  الأصعب ؟
الأصعب إن سد النهضة  عرضه 1.8 كيلومتر وارتفاعه 145 متر عشان كده هدمه بالكامل صعب  .. غير إن مجلس الأمن مش هيسيبك ولا حتى المجتمع الدولي غير الدول اللي لها مصالح في إثيوبيا وسد النهضة بالتحديد ، سواء دول أوروبية أو آسيوية وحتى دول عربية للأسف صديقة لمصر !
واضح !! 
يعني من الاخر كده مش هتكون كِسبت حاجة من تدمير سد النهضة غير إنك كمصر عقّدت الموضوع أكتر.
حاجة واحدة ممكن تستفيدها مصر من ضرب السد !
إيه ؟  
إنها هتعطل موعد تشغيله شوية وتوليد الكهرباء اللي إثيوبيا لغاية اللحظة أثبت فشلا كبيرا في توليده .. مش كلامنا  ، ده كلام مهم لوكالات شهيرة زي وكالة بلو مبرج  ووكالة تاس الروسية  ! 
طب ايه الحل ؟ 
الحل ،  إنك تقتنع إن المشكلة مش في بناء السد  ولازم نتعترف  !! افتح قوسين ( مصر موافقة على بناء السد من الأول )  .!
طب المشكلة فين  ؟ 
المشكلة في مُدة ملء السد ..  وأهو التخزين الخامس تم وجايز أوي  يكون في تخزين سادس  لو اضطرت إثيوبيا لده  واللي هيّ مصممة كمان إنها تملا السد على أد ما تقدر   وده اللي هيحرم مصر والسودان أكتر من 28 مليار متر مكعب من الميه سنويا .!
يعني وبكل بساطة لو إثيوبيا عدّلت الشرط ده اللي هو شرط الملء ..  الدنيا هتهدا ومش هيبقى فيه أزمة خالص أسمها سد النهضة بين مصر وإثيوبيا !
 اُمال مصر هتعمل  إيه ؟؟؟  
مصر شغال على الاتفاقيات الرسمية زي اتفاقية  اعلان المبادئ  اللي تم توقيعها في 2015 بين مصر وإثيوبيا والسودان ،التي  تنص  على عدم ملء السد إلا بموافقة مصر والسودان ، ولو محصلش ده ممكن ترجع مصر للتحكيم الدولي وخليكوا فاكرين :  التحكيم الدولي  هوّ اللي رجع  طابا لمصر من إسرائيل . 
طب الاخ ابي احمد اللي فارد صدره واللي عمال يروج إن الميه ميته والنيل نيل إثيوبيا .. نقوله إيه !
نقوله  :" أنت فاهم غلط   ..انت موهوم ، والنيل ده نهر دولي وفي اتفاقيات دولية مشتركة .. وده معناه إنه مفيش حد يقدر يبني عليه سدود  ير بموافقة دول نهر النيل وكمان تشارك في إدارته . 
ونوقف شوية هنا  ونأكد على النقطة دي  ، ودي الخلاصة :" تمسك مصر بالحل الدبلوماسي ده مش ضعف خالص  لكن  نابع من إيمانها من قوة موقفها .. وإن غضب إثيوبيا من لجوء مصر لمجلس الأمن نابع من ضعف موقفها ، السبب ببساطة مايخافش غير المجرم ، ولاّ إيه يا سيد آبي أحمد !